Таяуда ғана қазақстандықтардың басым бөлігі үшін жазғы демалыс Түркиямен байланысты болатын: таныс, жайлы әрі болжамды бағыт. Алайда соңғы бірнеше жылда қазақстандықтар Оңтүстік-Шығыс Азияға көбірек назар аудара бастады, деп хабарлайды «Объектив» басылымы Avianews.kz-ке сілтеме жасап.

Дананг курорты Қазақстанның туристік картасына тек 2025 жылы енгенімен, қазірдің өзінде жаңа тартымды бағыттардың біріне айналуға уәде беріп отыр. Неліктен? Өйткені Дананг – классикалық жағажай курорттарындағыдай қонақүй аумағында ғана демалып отыратын жер емес. Бұл қаланы сезінгің, дәмін татқың, зерттегің келеді. Мұнда демалыс жай ғана «бардым-көрдім» форматында өтпейді, керісінше адам толықтай еніп кететін ерекше оқиғаға айналады.

Данангтағы әр күн жеке бір тарау іспетті: өз қолыңмен бань ми дайындайтын аспаздық шеберлік сабақтарынан бастап, туристерді ескі достарындай қарсы алатын түрлі-түсті фестивальдерге дейін. Бұл жерде нені көру керек және қандай орындарға міндетті түрде барған жөн екенін айтып береміз.

Хойан – эмоциялар мекені

Мұнда туристер Хан өзені бойымен круизге шығып, қаланың кешкі шамдарына тамсана алады. Ал бірнеше сағаттан кейін кешкі серуендер үшін арнайы салынғандай көрінетін көне Хойан қаласына жетуге болады. Көшедегі шағын дүкендерде долларды жергілікті валютаға айырбастап, кәдесыйлар сатып алуға немесе тапсырыспен көйлек тіктіріп, оны тікелей қонақүйге жеткізуге болады.

Биіктегі ғажайып: Ba Na Hills

Өңірдің басты көрікті жерлерінің бірі – Ba Na Hills тау курорты. Еуропалық шағын қала стилінде салынған бұл жерде сарайлар, бақтар, винтажды сәулет үлгілері және алып қолдар ұстап тұрған әйгілі Алтын көпір орналасқан. Курортқа әлемдегі ең ұзын аспалы жолдардың бірі арқылы жетуге болады және бұл сапардың өзі ерекше әсер сыйлайды.

1400 метрден астам биіктікте ауа әлдеқайда таза, ал көріністер таңғалдырады. Мұнда жыл бойы салқындау климат сақталады. Бір жағынан Еуропаны еске түсіргенімен, айналадағы буддистік храмдар, пагодалар мен көше әртістері оған ерекше вьетнамдық сипат береді. Балалармен саяхаттайтын туристер үшін курорт аумағында ойын-сауық саябағы жұмыс істейді.

Сөзсіз театр: Tien Sa қойылымы

Мәдени әсер іздейтіндер үшін міндетті түрде көруге тұрарлық қойылымдардың бірі – Tien Sa. Бұл спектакльде би, акробатика, жарық инсталляциялары және вьетнамдық фольклор шебер үйлескен.

Ең қызығы – қойылымның сюжетін түсіну үшін ағылшын немесе вьетнам тілдерін білу қажет емес. Махаббат, жанқиярлық пен сиқыр туралы оқиға дене қимылы мен музыка арқылы баяндалады және алғашқы минуттардан-ақ көрерменді баурап алады.

Қойылымнан кейін ерекше эмоциялық әсер қалады. Бұл – өнердің әмбебап тілі арқылы әр көрерменмен жеке сөйлесе алатын сирек дүниелердің бірі.

Балалармен саяхаттайтындар үшін немесе өзін қайтадан бала сезінгісі келетіндерге VinWonders Nam Hoi An ойын-сауық паркі тамаша таңдау болмақ. Мұнда аквапарк, аттракциондар, сафари-аймақ және мәдени интерактивті кеңістіктер бар.

Бұл – бір күнге арналған тұтас әлем. Мұнда сафари аумағында керік пен зебраны көріп, америкалық төбешіктерге мініп, су ойын алаңдарында көңіл көтеріп, кейін көне Вьетнам стиліндегі көшелерде көше театрларын тамашалап, қолөнершілердің жұмысымен танысуға болады. Барлығы Данангтан шамамен бір сағаттық жерде орналасқан.

Айдаһар көпіріндегі шоу

Әр жұма, сенбі және жексенбі кештерінде Данангтағы Хан өзені үстіндегі көпір нағыз шоу алаңына айналады. Алып айдаһар пішінінде салынған Dragon Bridge көпірі тіріліп кеткендей әсер қалдырады: ол музыка мен көрермендердің қошеметі аясында от шашып, су бүркеді.

Бұл – Оңтүстік-Шығыс Азиядағы ең әсерлі тегін шоулардың бірі. Көпір тек сәулетімен ғана емес, мерекелік атмосферасымен де таңғалдырады. Шоуды өзен жағалауынан немесе кешкі өзен круизі кезінде тамашалаған ыңғайлы (өзен круизі бөлек төленеді – авт. ескертпесі).

Халықаралық отшашу фестивалі: аспан кенепке айналған сәт

Әр жаз сайын Дананг өңірдегі ең жарқын шаралардың бірі – Da Nang International Fireworks Festival (DIFF) халықаралық отшашу фестивалінің орталығына айналады. Әлемнің түкпір-түкпірінен келген пиротехникалық командалар Хан өзені үстінде әсерлі жарық шоуларын ұсынады.

Әр қойылым жай ғана отшашу емес, музыкамен сүйемелденген оттың хореографиясы іспетті. Фестиваль күндері қала ерекше қуатқа бөленеді: концерттер, көше фестивальдері, шеберлік сабақтары мен шерулер өтеді. Егер сапарыңызды маусым–шілде айларына жоспарласаңыз, фестиваль күндерін алдын ала нақтылап алған жөн.

Саяхатшыларға арналған пайдалы кеңестер

Қай уақытта барған дұрыс: Сапар үшін ең қолайлы кезең – наурыздан қыркүйекке дейін. Жазда ауа райы ыстық болғанымен, жауын-шашын аз түседі. Күзде тропикалық нөсерлер басталады.

Қалай жетуге болады: Данангқа тікелей чартерлік рейстерді KOMPAS туроператоры ұйымдастырады. Турпакет құрамына әуе рейсі, трансфер, қонақүйде тұру және сақтандыру кіреді.

Қайда орналасқан жөн: Мұнда кез келген бюджетке лайық қонақүйлер мен резорттар бар – қолжетімді үш жұлдызды нұсқалардан бастап мұхит көрінісі ашылатын бес жұлдызды қонақүйлерге дейін.

Неден дәм тату керек: Міндетті түрде бань ми, фо бо, жұмыртқалы кофе және жаңа ауланған теңіз өнімдерін көріңіз. Өзен жағасындағы мейрамханалар мен тар көшелердегі кафелер әртүрлі, бірақ бірдей әсерлі гастрономиялық тәжірибе сыйлайды.

Қала ішінде қатынау: Ең ыңғайлы көлік – такси (Grab немесе InDriver қосымшалары арқылы) немесе тәжірибеңіз болса, байк жалға алу. Экскурсияларды гидтер арқылы сатып алған қауіпсіз.

Валюта айырбастау: Ақшаны қонақүйлерде де, көшедегі айырбастау орындарында да ауыстыруға болады.

Байланыс және интернет: Жергілікті SIM-карталар арзан әрі тұрақты интернет ұсынады. Оларды әуежайдан-ақ сатып алуға болады.

Дананг – картадағы жай ғана нүкте емес. Бұл – саяхаттың әр сәтін терең сезінуге, дүниеге кеңірек қарауға шақыратын ерекше бағыт. Биылғы жазда ол сіздің жеке өнер туындыңызға айналуы мүмкін.

Дереккөз: obk.kz