20 қыркүйекте Алматы қаласында Air Astana әуе компаниясының серіктестеріне арналған дәстүрлі агенттік конференциясы өтті. Биылғы кездесудің тақырыбы «Уақыт ағымы» деп аталды. Бұл маңызды іс-шараға туризм саласының үздік өкілдері – Қазақстандағы туроператорлар мен туристік агенттіктердің директорлары, топ-менеджерлері және әуе компаниясының өзге де серіктестері қатысты.

Конференция тәжірибе алмасуға, жаңа өнімдерді таныстыруға және туристік бағыттарды дамыту стратегияларын талқылауға арналған тиімді алаңға айналды. Қатысушылар саладағы заманауи үрдістер туралы білімдерін толықтырып, инновациялық ұсыныстармен танысып, өзара ынтымақтастықты дамыту мүмкіндіктерін талқылады.

Конференцияға шақырылған 69 туроператор мен туристік агенттікке сағат пішініндегі арнайы мүсіншелер табысталды. Бұл – 2023 жылғы үздік сатылымдары үшін Air Astana компаниясының «Оскары» іспеттес марапат. Осы беделді марапатқа KOMPAS Touroperator да ие болды.

«Бұл – біздің осындай беделді марапатты алғаш рет алуымыз емес, – дейді KOMPAS Touroperator компаниясының Алматыдағы кеңсесінің директоры Ольга Алексеева. – Air Astana біз үшін стратегиялық серіктес қана емес, 19 жылдан бері бірге өсіп, бірге дамып келе жатқан сенімді әріптес. Авиация саласында жоғары стандарттарды қалыптастырып отырған компаниямен жұмыс істейтінімізді мақтан тұтамыз және алда бұдан да ауқымды жобалар мен жаңа жетістіктер күтіп тұрғанына сенімдіміз.»

Сонымен қатар, 31 компания «Қолдауы мен жемісті ынтымақтастығы үшін» алғыс дипломдарымен марапатталды. Сондай-ақ Air Astana компаниясымен ұзақ жылдар бойы серіктестік орнатқан ұйымдардың өкілдері де ерекше аталып өтті. Қазақстан туристік қауымдастығының (ҚТҚ) директоры Рашида Шайкеноваға және «Туристик Камкор» корпоративтік қорының төрайымы Инна Рейге сағат пішініндегі арнайы мүсіншелер табысталды. Марапаттарды Air Astana компаниясының маркетинг және сату жөніндегі вице-президенті Әділ Дәулетбек пен сату және жүк тасымалы жөніндегі директоры Жанна Шаяхметова табыс етті.

Бұл конференция туристік агенттіктер мен туроператорларға Air Astana компаниясымен серіктестік байланыстарын нығайтуға және өз клиенттеріне сапалы әрі тиімді туристік шешімдерді ұсынуға тамаша мүмкіндік болды.