Малайзия мен Қазақстан туристік ынтымақтастықты нығайтуда

24 және 27 сәуірде Алматы мен Астанада Малайзия мен Қазақстанның туристік сала өкілдерінің басын қосқан іскерлік воркшоптар өтті. Қатысушылар серіктестік байланыстарды дамыту, туристік бағдарламаларды кеңейту және Оңтүстік-Шығыс Азиядағы жаңа демалыс бағыттарының мүмкіндіктерін талқылады. Іс-шараларды Алматыдағы Tourism Malaysia өкілдігі KOMPAS Touroperator компаниясының қолдауымен ұйымдастырды.

Бүгінде Малайзия өңірдегі ең жарқын әрі сан қырлы туристік бағыттардың бірі саналады. Мұнда заманауи мегаполистер көне тропикалық ормандармен үйлесім тапса, бай мәдени өмір жағажай демалысы, гастрономиялық бағыттар және дайвинг мүмкіндіктерімен толықтырылған. Осындай алуан түрлілік елді қазақстандық туристер үшін ерекше тартымды етеді.

Алматыдағы шарада қатысушыларды Tourism Malaysia ұйымының Алматыдағы директоры Нор Шазли Азми мырза қарсы алды. Ол воркшопқа Малайзияның туристік агенттіктері, туроператорлары, әуе компаниялары мен қонақүй бизнесінің өкілдері қатысқанын айтып, кездесудің басты мақсаты – екі ел арасындағы кәсіби байланысты нығайтып, ұзақмерзімді ынтымақтастықты дамыту екенін атап өтті.

Қазақстан туристік қауымдастығының директоры Рашида Шайкенова қазақстандықтардың Малайзияға деген қызығушылығы артып келе жатқанын айтты.

– Қазір туризм саласы үшін оңай кезең емес, шетелге шығу туризмінің географиясы тарылып келеді. Сондықтан Алматыда Малайзия өкілдігінің ашылуы – маңызды қадам әрі біздің нарықпен жүйелі жұмыс істеуге дайын екендігінің айғағы. Егер 2023 жылы елге шамамен 9 мың қазақстандық барған болса, бүгінде бұл көрсеткіш 43 мың туристке жетті. Бұған тікелей әуе рейстері мен визасыз режим ықпал етті. Иә, жол ұзақ болғанымен, оған тұрарлық. Жағажай демалысы, сауықтыру, бірегей мәдениет пен гастрономия – бұл елдің саяхатшыларға ұсынатын мүмкіндіктері шексіз, – деді ҚТҚ басшысы.

Астанадағы кездесу Малайзияның Қазақстан Республикасындағы Елшісі Мохд Адли Абдулла мырзаның қатысуымен өтті. Ол екі ел арасындағы ынтымақтастықтың туризммен қатар экономикалық салада да кеңейіп келе жатқанын айтты. Сонымен қатар іс-шараға Tourism Malaysia ұйымының Алматыдағы директоры Нор Шазли Азми, «Туристік Қамқор» КҚ басқарма төрағасы Инна Рей және Astana Tourism басқарма төрағасы Артем Квашук қатысты.

Екі воркшоп та іскерлік кездесулер мен нетворкинг форматында өтті. Қатысушылар Лангкави аралындағы премиум демалысты ұйымдастырудан бастап, Куала-Лумпурдағы медициналық туризмді дамытуға дейінгі көптеген мәселелерді талқылады. Мұндай формат кәсіби байланыстарды тиімді жолға қоюға және нарықтағы өзекті ақпаратпен алмасуға мүмкіндік берді.

Сату саласында жұмыс істейтін қазақстандық сарапшылардың айтуынша, бұл бағытқа деген қызығушылық тұрақты түрде өсіп келеді. Алайда, олардың пікірінше, қазіргі туристің талғамы өзгерген. Бұл туралы Atmosphere Voyage туристік агенттігінің өкілі Екатерина Морозова өз ойымен бөлісті:

– Малайзияны көбіне саяхат тәжірибесі мол, жайлылық пен белсенді демалысты қатар бағалайтын 40–50 жастағы жұптар таңдайды. Олар үшін демалыс – жағажайда тынығу ғана емес, жаңа әсер мен білім алу. Сонымен қатар бүгінде гастрономиялық турларға деген сұраныс артып келеді: туристер өңірдің төл тағамдарымен танысу үшін арнайы сапарларға шығуда.

«Увертюра» туристік агенттігінің өкілі Айнур Мусабекованың пікірінше, Малайзия тек шопинг пен экскурсияларымен ғана емес, білім беру турларымен де тартымды. Сонымен қатар ел ірі транзиттік хаб мәртебесін сақтап отыр.

– Клиенттеріміз көбіне аралас маршруттарды таңдайды: қарқынды Куала-Лумпур мен Лангкави аралындағы тыныш демалысты үйлестіреді. Қазір бұл бағыт қарқынды жаңарып жатыр: көптеген жаңа қонақүйлер мен туристік орындар ашылды. Біз оларды қазақстандық туристерге қайта таныстыруымыз керек.

Іс-шараларға жалпы саны 200-ден астам туристік агент қатысты. Өткен кездесулер Қазақстан мен Малайзия арасындағы туристік ынтымақтастықты дамытуға деген жоғары қызығушылықты тағы бір мәрте дәлелдеп, алдағы уақытта бірлескен жобаларды жүзеге асырудың жаңа мүмкіндіктерін айқындады.