Кипрге тікелей: жаңа бағыт нарықты қалай өзгертуде

24 сәуірде Алматыда KITF 2026 халықаралық туристік көрмесі аясында Астана – Ларнака бағыты бойынша тікелей әуе рейсінің ашылуына арналған салалық воркшоп өтті. Қазақстан алғаш рет Кипрге тұрақты тікелей рейстерді іске қосып отыр. Туристік нарық өкілдері бұл оқиғаны бағыттың дамуындағы жаңа кезең деп бағалауда.

Биыл Кипр Туризм министрлігі алғаш рет KITF көрмесіне қатысып, қонақүйлер мен DMC-компанияларымен бірлескен стенд ұсынды. Көрме қонақтары Афродита аралындағы демалыстың ерекшеліктерімен танысты.

Тікелей рейсті іске қосу жобасының бастамашылары Air Astana, KOMPAS Touroperator және Кипр Туризм министрлігі болды. Алматыдағы воркшоп алаңына Қазақстанның туристік нарығынан 100-ден астам өкіл және аралдағы танымал отбасылық қонақүйлерден бастап премиум санаттағы курорттарға дейінгі 16 қонақүйдің өкілдері жиналды.

Тікелей рейстер ашылғанға дейін Кипр қазақстандық туристер үшін жол қатынасы күрделі бағыттардың бірі болып келді. Қайта қонумен орындалатын рейстер аралға деген жоғары қызығушылыққа қарамастан сұранысты шектеп отырды. Енді жағдай өзгеруде: рейстер аптасына екі рет Астана мен Алматыдан Airbus A321 және A321LR ұшақтарымен орындалады, ал ұшу ұзақтығы шамамен 5–6 сағатты құрайды. Сонымен қатар визаны рәсімдеу тәртібі жеңілдетілді – құжаттарды қарау мерзімі қысқарып, биометриялық рәсімдер алынып тасталды және қажетті құжаттар тізімі азайтылды.

Маусым айының басынан бастап туристерге Кипрге тікелей рейспен алғашқы пакеттік турлар қолжетімді болды. Алматыдан рейстер 2026 жылғы 4 маусымда, Астанадан 2026 жылғы 2 маусымда басталады. Турлардың ұзақтығы – 7 түн.

Туристерге аралдың ең танымал курорттарында түрлі орналастыру нұсқалары ұсынылады. Айя-Напада ATLANTICA PANTHEA 4*, MELPO ANTIA HOTEL AND SUITES 4* және әйгілі Nissi Beach жағажайының жанында орналасқан премиум санаттағы NISSIBLU BEACH RESORT 5* қонақүйлері бар. Протараста теңіз көрінісі мен жасыл аумағымен ерекшеленетін CAVO MARIS BEACH HOTEL 4* ұсынылады, ал Ларнакада жоғары сервисімен және тыныш атмосферасымен танымал GOLDEN BAY BEACH HOTEL 5* орналасқан.

Әуе рейстерін Air Astana орындайды. Сонымен қатар туристерге визалық қолдау қызметі ұсынылады: Кипрдің ұлттық визасы шамамен бес жұмыс күні ішінде рәсімделеді және құжаттарды тапсыру кезінде жеке қатысу талап етілмейді.

«Біз Қазақстанды өте маңызды ел әрі Орталық Азияға ашылатын өзіндік “қақпа” ретінде қарастырамыз. Тікелей рейстер туризмге ғана емес, сауда мен іскерлік байланыстардың дамуына да оң әсер етеді», – деді Қазақстандағы Кипр Республикасының Елшісі Петрос Накузис.

Air Astana өкілі де жаңа бағыттың стратегиялық маңызын атап өтті: «Әуе тасымалдаушысы әрі Қазақстанның халықаралық деңгейдегі елшісі ретінде біз жаңа бағыттардың ашылуын елдер арасындағы байланысты нығайтудың маңызды мүмкіндігі деп есептейміз».

Воркшоптың практикалық бөлігінде бағытты сату ерекшеліктері, курорттардың артықшылықтары, демалыс форматтары және туристердің әртүрлі санаттарымен жұмыс істеу мәселелері талқыланды. Туризм саласының мамандары қонақүй өкілдерімен тікелей пікір алмасу туристік өнімді тереңірек түсінуге және клиенттердің түрлі сұраныстарына сәйкес ұсыныстар дайындауға мүмкіндік бергенін атап өтті.

Кипр Туризм министрлігінің өкілі Мария Михайлова аралдың туристік әлеуетін таныстырып, жағажай, отбасылық, гастрономиялық және экскурсиялық туризмнің алуан түрлері туралы баяндады. Қатысушыларға Ларнака, Пафос, Айя-Напа, Никосия және Троодос таулы өңірі таныстырылды.

Бағыттың даму әлеуетіне де ерекше назар аударылды. Кипрдің Статистика бюросының мәліметінше, 2025 жылы аралға 4,5 миллионнан астам турист келген. Бұл – ел тарихындағы рекордтық көрсеткіш және өткен жылмен салыстырғанда 12%-ға жоғары. Келушілердің негізгі нарықтары – Ұлыбритания, Израиль, Польша және Германия. Кипр тарапы болашақта Қазақстан да негізгі туристік нарықтардың біріне айналады деген сенім білдірді.

Воркшоп Olympus party форматындағы гала-кешпен қорытындыланды. Қонақтардың айтуынша, кештің тақырыптық безендірілуі Кипрдің ерекше атмосферасын сезінуге және болашақ туристік өнімнің көңіл күйін жақсырақ түсінуге мүмкіндік берді. Сондай-ақ кеш барысында сыйлық сертификаттарының ұтыс ойыны ұйымдастырылды.

Жалпы алғанда, Астана – Ларнака бағытының ашылуы Қазақстан мен Кипр арасындағы туристік байланыстардың жаңа кезеңін бастап, екі ел арасындағы туристік ағынның одан әрі артуына кең мүмкіндік ашады.