2022 жылдың жазы пандемиядан кейін туристік бағыттардың басым бөлігі шектеулерді алып, жаңа рейстерді ашқан алғашқы жаз болды.  Tengritravel.kz тілшісі туроператорлардан күзде туристерге қандай бағыттар ұсынылатынын және олардың бағасы қанша болатынын анықтауды жөн көрді.

Туроператорлардың ақпаратына сәйкес, өткен жылмен салыстырғанда бағалар 30 пайызға және одан да жоғары өскеніне қарамастан, ең танымал бағыт Түркия болды. Танымалдығы бойынша екінші орында БАӘ тұрды. Қолайлы ауа райы жағдайлары мен Шымкенттен Дубайға чартерлік бағдарлама ашылуы маңызды рөл атқарды. Үшінші орынды Қазақстан бойынша саяхаттар мен Мысыр өзара бөлісті. Kids Go Free бағдарламасының арқасында көптеген қазақстандық отбасы Каспий жағалауында тамаша демалып қайтты. Бұл бағыттарға жаңа чартерлік бағдарлама ашылуына байланысты Италияны және Грекияның Крит аралын да қосуға болады. 

Сарапшылардың ақпараты бойынша, Антальяға турлар бір адамға орта есеппен 300 000 теңгеден басталды, ал Бодрумда қымбатырақ болды — орташа есеппен 350 000 теңгеден басталды. Италияға алты күндік тиімді турлардың бағасы 300 000 теңгеден басталды. Грекияға 9 түндік турлар 211 000 теңгеден басталды.

KOMPAS Touroperator компаниясының Қазақстандағы атқарушы директоры Светлана Ошерова күзгі-қысқы маусымға блоктық және чартерлік бағдарламалар бойынша БАӘ (Алматы, Астана, Шымкент және Ақтөбеден Дубайға, Алматы мен Астанадан Абу-Дабиге ұшатын рейстермен), Мысыр, Таиланд (Пхукет, Бангкок), Үндістан (Гоа), Түркия және Мальдив аралдары бағыттарының ұсынылғанын айтты.

«Тұрақты рейстер арқылы Еуропаға, Малайзияға, Доминикан Республикасына, Катарға, Сауд Арабиясына, Оңтүстік Кореяға және басқа да көптеген елдерге баруға болады. 30 қыркүйекке дейін Үндістан, Мальдив аралдары, Таиланд, Мысыр бағыттарындағы қонақүйлерге ерте брондау акциялары мен 60 пайызға дейінгі жеңілдіктер қолданылады.

Биыл FIFA-ны ескере отырып, БАӘ-дегі қонақүйлердің жүктемесі барынша жоғары болады, өйткені Дубайдан Дохаға күн сайын 8 әуе шаттлы қатынайды; қазақстандықтар жақсы көретін Шарм-эль-Шейх курортына түсетін жүктеме де БҰҰ саммитіне байланысты барынша жоғары болады, ал барлық шектеулерді алып тастаған Оңтүстік-Шығыс Азия да барлық туристер үшін сұранысқа ие бағытқа айналады. Сондықтан қазірден бастап күзгі-қысқы саяхатыңызды жоспарлау туралы ойланған жөн. Өкінішке қарай, қазіргі уақытта «соңғы минуттағы» турлар азайып барады», — деп бөлісті Светлана.

Толық мақаланы оқу >>