ITB Berlin көрмесінің қонақтарын ерекше тәнті еткен – қазақтың киіз үйі.

«Kazakh Tourism» ұлттық компаниясы, KOMPAS Touroperator және Қазақстанның туристік саласының басқа да өкілдері 7–9 наурыз аралығында Германия астанасында өткен Еуроодақтағы ең ірі халықаралық туристік көрме – ITB Berlin көрмесінде еліміздің туристік әлеуетін таныстырды. Пандемия басталғаннан кейін алғаш рет ұйымдастырылған көрме әлемнің түкпір-түкпірінен туризм саласының мамандарын жинады. Ресми мәлімет бойынша, үш күн ішінде көрмеге 180 елден 90 мыңнан астам адам келді.

KOMPAS «Kazakh Tourism» ҰК» АҚ ұйымдастырған Қазақстан Республикасының біріккен ұлттық стендінің негізгі қатысушыларының бірі болды. Көрме барысында бұл алаң келушілер ең көп жиналған орындардың біріне айналды. Әсіресе, отандық қолөнершілер мен суретшілер табиғи материалдардан жасаған қазақтың дәстүрлі киіз үйі көпшіліктің ерекше қызығушылығын тудырды. Сонымен қатар қонақтар Қазақстанның заманауи ұлттық асханасының тағамдарынан дәм татты.

Берлинге Қазақстанның туризм саласынан қабылдаушы компаниялар мен қонақүйлерді қоса алғанда 30-дан астам өкіл қатысты. Бұл Қазақстанның халықаралық көрмелердегі ең ауқымды делегацияларының бірі болды және Еуропа нарығының еліміздің келу туризмін дамытудағы маңызын тағы бір мәрте көрсетті.

«Бұл көрмеде біздің туристік бизнес әлеуетті серіктестермен іскерлік байланыс орнатуда. Қазақстанның ұлттық стенді келушілердің үлкен қызығушылығын тудырды деп ойлаймын. Сонымен қатар Kazakh Tourism Германиядан туристерді тарту мақсатында әлемдегі ең ірі туристік ұйымдардың бірі – PATA (Азия-Тынық мұхиты туристік қауымдастығы) өңірлік өкілдігімен тығыз жұмыс жүргізуді жоспарлап отыр», – деді «Kazakh Tourism» ҰК» АҚ Басқарма төрағасы Талғат Аманбаев.

Германиядан және Еуропалық Одақтың басқа елдерінен келетін туризмнің дамуына әуе қатынасының кеңеюі де оң әсер етеді. Бұдан бөлек, Батыс Еуропа елдерінің көпшілігі үшін Қазақстан визасыз бағыт болып саналады. Осы факторларды ескере отырып, елімізге келетін туристер санының арту әлеуеті өте жоғары.