KOMPAS Touroperator атқарушы директоры Светлана Ошерова TAJ.Report басылымына ерте брондау артықшылықтары, көктем-жаз маусымындағы ұсынылатын бағыттар, Қазақстан ішінде балаларға арналған тегін әуе сапарларын ұйымдастыру және басқа да тақырыптар бойынша пікір білдірді.

Ерте брондау — бұл туроператорлар, қонақүйлер және әуе компаниялары бірлесіп әзірлеген акция. Ол туристерге сапарларын алдын ала тиімді бағамен брондап, қолайлы күндерді таңдауға мүмкіндік береді. Өйткені маусым кезінде жақсы қонақүйлерде бос орын табу және чартерлік не тікелей рейстерге билет алу қиынға соғады.

Қазақстандық туристер үшін жазғы демалысқа ерте брондау шеңберінде Түркия, БАӘ, Мысыр, Грекия, Черногория және Италия сияқты бағыттар ұсынылады. Туроператорлардың дерегінше, көктемде үнемді сапарлар Үндістанның Гоа штатына, Шри-Ланка аралына және Паттайяға ұйымдастырылады. Наурыз–сәуір айларына арналған бағалар бір адамға 7 түнге 280–300 мың теңгеден басталады.

Светлана Ошерова пакет турлардың шамаменгі бағаларын да атады: БАӘ – бір адамға 600 доллардан, Тайланд – 1300 доллардан, Мальдив аралдары – 1500–2000 доллардан, Сейшел аралдары – 2000–3000 доллар шамасында.

«Көктем мезгіліне арналған үнемді бағыттар – Гоа, Шри-Ланка және Вьетнам. Бағасы сәл жоғарырақ болатын бағыттар – БАӘ мен Мысыр. Жазда бұл бағыттар арзандайды, себебі ауа температурасы жоғары болады. Дегенмен, туристердің айтуынша, өткен жазда аптап ыстық шамалы болды. Сондай-ақ жазда Грузияға баруға болады. Алайда мереке күндері, мысалы Наурыз мейрамы кезінде, турлардың бағасы жоғарырақ болатынын есте сақтау қажет. Бұл – сұраныстың артуына байланысты», — деді ол.

Сондай-ақ Светлана Ошерова ішкі туризм бағыттарында жұмыс істейтін Kids Go Free бағдарламасы туралы пікір білдірді. Kids Go Free бағдарламасы 2 жастан 17 жасқа дейінгі балаларға Қазақстан қалалары арасында тегін ұшу мүмкіндігін береді.

«Бұл бағдарлама ішкі туризмді дамыту мақсатында Kazakh Tourism тарапынан субсидияланады. Ол тек туристік пакет сатып алынған жағдайда жұмыс істейді. Яғни, егер сіз өзіңізге және балаңызға әуе сапары мен тұруды қамтитын толық туристік пакет рәсімдесеңіз, онда балалар үшін тегін әуе сапары қарастырылады. Бұл бағдарламаға тек Қазақстан Республикасының азаматтығы бар балалар ғана қатыса алады», — деп түсіндірді ол.

Дереккөз: taj.report